Мемлекеттік хатшы Гана Республикасының, Джибути Республикасының, Никарагуа Республикасының, Албания Республикасының және Бахрейн Корольдігінің Қазақстандағы Төтенше және өкілетті елші қызметін қоса атқаратын елшілерінен сенім грамоталарын қабылдады.
Г.Әбдіқалықова БҰҰ Қауіпсіздік Кеңесінің 2017-2018 жылдардағы тұрақты емес мүшелігіне ұсынылған Қазақстан Республикасының кандидатурасын қолдағандары үшін Никарагуа мен Джибути елшілеріне алғысын айтып, Гана, Албания Республикалары және Бахрейн Корольдігі біздің кандидатурамызды қолдайды деп үміттенетінін жеткізді.
Гана Республикасының елшісі Кодзо Кпоку Алабомен болған әңгіме барысында Мемлекеттік хатшы Қазақстанның Гана Республикасымен және басқа да Африка мемлекеттерімен ынтымақтастықты нығайтуға мүдделі екенін атап өтті. Мәселен, Қазақстан мен Гана арасындағы тауар айналымы 2015 жылғы 9 айда 11,5 миллион АҚШ долларын құраған. Сондай-ақ біздің ел Африкалық одақта байқаушы мәртебесіне ие.
Джибути Республикасының елшісі Мохаммед Әли Камильмен және Бахрейн Корольдігінің елшісі Ибрахим Юсеф әл-Абдалламен кездесуде Г.Әбдіқалықова елдердің Ислам Ынтымақтастығы Ұйымы шеңберіндегі табысты өзара іс-қимылына тоқтала отырып, Қазақстан Президентінің штаб-пәтері Астана қаласында орналасатын Ислам азық-түлік қауіпсіздігі жөніндегі ұйымын құру туралы бастамасын қолдағаны үшін ризашылығын білдірді.
Никарагуа елшісі Хуан Эрнесто Васкеспен кездесу кезінде Мемлекеттік хатшы Қазақстан ЮНЕСКО-ның атқарушы кеңесіне 2015-2019 жылдардағы Никарагуаның кандидатурасына қолдау көрсеткенін айта келіп, «ЭКСПО-2017» көрмесін өткізу құқығына Астананың кандидатурасын қолдағаны үшін алғыс білдірді.
Албания Республикасының Елшісі Арбен Газионимен екіжақты кездесу кезінде Г.Әбдіқалықова еларалық диалогты одан әрі тереңдете түсу мүмкіндіктеріне назар аударды. Бұл жөніндегі уағдаластыққа Албания Министрлер Кеңесінің төрағасы Э.Раманың Қазақстанға 2014 жылғы мамырдағы ресми сапары барысында қол жеткізілген болатын.
Шет мемлекеттердің елшілері ауқымды мәселелер бойынша байланыстарды кеңейтуге өзара мүдделілік танытатындарын айтты. Бұл орайда қаржы, мұнай-газ секторындағы және тау-кен өнеркәсібі, тамақ өнімдерін өндіру, баламалы энергетика және басқа да салалардағы ынтымақтастық бағыттары атап өтілді. Мемлекеттік хатшы аталған мемлекеттердің Төтенше және өкілетті елшілерінің қызметі Бес институционалдық реформа мен Мемлекет басшысының «Қазақстан жаңа жаһандық нақты ахуалда: өсім, реформалар, даму» деп аталған биылғы Жолдауын іске асыру аясында елдер арасындағы ынтымақтастықты өрбітуге ықпал ететінін айтты, сондай оларды халықаралық «Экспо-2017» мамандандырылған көрмесінің жұмысына қатысуға шақырды.