Хатта бүгінде елімізде Елбасының салиқалы саясатының арқасында жастардың жоғары интеллектуалдық деңгейі қалыптасқаны атап өтіледі. Сонымен қатар, олар бүгінгі таңда қазақ елінде жастар үшін барлық жағдай жасалғанына тоқталған. XXI ғасырда Қазақстанның инновациялық даму жолында жастар өздерінің бар білімі мен күш-жігерлерін салатынын айтады.
«Сіз өзіңіздің «Қазақстан білім қоғамы жолында» атты интерактивті дәрісіңізде қазіргі қазақ елінің табысты дамуындағы жастардың роліне ерекше тоқталып өттіңіз. Сіздің осы дәрісіңіз және оған дейінгі жастарға арналған әрбір сөзіңіз барлық жас азаматты бей-жай қалдырмайды. Біз, республикалық жастар ұйымдарының өкілдері, мемлекетіміздің гүлденуі мен көркеюі жолына барлық күш-қуатымызды жұмсайтынымызды мәлімдейміз» делінген хатта.
Авторлар хат соңында ел басшысының әр өнегелі ісінен үлгі алып, стратегиялық бағытын толықтай қолдай отырып, интеллектуалды ұлт құруда аямай қызмет ететіндіктеріне сенім білдіреді.
Ұжымдық хатқа «Нұр Отан» ХДП жанындағы «Жас Отан» жастар қанаты» ҚБ, ҚР Президентінің халықаралық «Болашақ» стипендиясы стипендиаттарының қауымдастығы, «Қазақстан жастар конгресі» ЗТБ, «Қазақстан студенттер альянсы» РСҚ», ҚБ жетекшілері, т.б. қол қойған.