Мемлекет басшысы брифингте Қазақстанның Сербияны Еуропа өңіріндегі маңызды әрі перспективалы серіктес ретінде қарастыратынын айтты.
Елдеріміздің арасында сенімді қарым-қатынас орнаған. Бүгін біз ынтымақтастығымызды арттыру жолдарын талқыладық. Негізгі мақсат – сауда-экономикалық өзара іс-қимылды дамыту, бұл тұстағы әлеует әзірге аз пайдаланылуда. 2016 жылы сауда-экономикалық ынтымақтастық жөніндегі Үкіметтік комиссияның бірінші отырысын өткізу туралы уағдаластыққа қол жеткіздік, – деді Қазақстан Президенті.
Нұрсұлтан Назарбаев республикамызда серб капиталының үлесі бар жиырма шақты бірлескен кәсіпорын құрылыс және сауда саласында жұмыс істейтініне назар аударды.
Атап айтсақ, серб компаниялары Алматы метрополитенінің бірқатар стансаларының құрылысына қатысты. Перспективалы бағыт ретінде өңдеу, көлік және транзит, құрылыс, ауыл шаруашылығы, туризм, шағын және орта бизнес секторларындағы бірлескен жобаларды айтуға болады. Мен серб компанияларын Қазақстанның индустриялық-инновациялық даму бағдарламасын жүзеге асыруға, сондай-ақ дүниежүзілік «ЭКСПО-2017» көрмесінің дайындығы мен оны өткізу ісіне қатысуға шақырамын, – деді Қазақстан Президенті.
Нұрсұлтан Назарбаев Қазақстан мен Сербияның өзара іс-қимылдарын кеңейтуге қатысты бірқатар шараны атады.
Біз Азия мен Еуропа арасындағы жүк тасымалы көлемін ұлғайту аясында Қазақстан мен Сербияның көлік-транзиттік әлеуетін өзара пайдалану жөнінде пікір алмастық. Еуразиялық экономикалық одақтың бірыңғай нарығы аясындағы ынтымақтастық мүмкіндіктерін талқыладық. Қосарланған салық салық салуды болдырмау, халықаралық автомобиль тасымалы, құқықтық саладағы ынтымақтастық туралы келісімдерге қол қою біздің серіктестігімізді дамытуға септігін тигізеді. Шығыс Қазақстан облысы әкімдігі мен Сербияның Златибор өлкесі муниципалитетінің арасындағы ынтымақтастық туралы меморандумға қол қою өңіраралық байланыстарды дамытуды көздейді, – деді Мемлекет басшысы.
Елбасы Қазақстан мен Сербияның халықаралық аренадағы ынтымақтастығы келіссөздердің маңызды бөлігі болғанын айтты.
Біздің мемлекеттеріміздің жаһандық және өңірлік саясаттағы өзекті мәселелер бойынша ұстанымдары ұқсас. Біз Сербияның Еуропалық одаққа кіру ниетін қолдаймыз. Сербия БҰҰ Қауіпсіздік кеңесінің 2017-2018 жылдардағы тұрақты емес мүшелігіне Қазақстанның кандидатурасын мақұлдағаны және елімізге ДСҰ-ға кіру барысында қолдау көрсеткені үшін алғыс білдіреміз. Сербияның Еуропадағы қауіпсіздік және ынтымақтастық ұйымындағы төрағалығын жоғары бағалаймыз. Хельсинки Қорытынды актісіне қол қоюдың 40 жылдығында ЕҚЫҰ қолдауымен Еуропаның қауіпсіздігі саласында ашық әрі сындарлы диалог бастау маңызды екеніне сенімдімін, – деді Нұрсұлтан Назарбаев.
Мемлекет басшысы Сербия Президентінің Қазақстанға сапарының қорытындысына екі жақ та қанағаттанатынын атап өтті.
Келіссөздер нәтижесі екіжақты ынтымақтастықтың бүкіл саласы бойынша өзара іс-қимылды кеңейтуге деген ортақ ықылас бар екенін көрсетті, – деді Қазақстан Президенті.
Соңында Нұрсұлтан Назарбаев өзара сенім мен түсіністік, сондай-ақ жемісті ынтымақтастық үшін Т.Николичке және Сербия тарапына алғыс айтты.
Сербия Президенті өз елінің әсіресе экономикалық қарым-қатынастарды дамытуға ынталы екенін атап өтті.
Қазақстанның Белградта ресми түрде құрметті консулдық ашқанына қуаныштымын. Менің сапарымнан кейін екіжақты тауар айналымы да ұлғаяды деп үміттенемін. Сербия инвестиция салу үшін нағыз серіктес болады. Қазақстан жақсы географиялық жағдайға ие, ал инвесторлар мұнда білікті жұмыс күшіне сенім арта алады. Сербия достықты сауда алмасу көлемімен өлшемейді. Қазақстан да мұны 2014 жылғы мамырдағы су тасқыны кезінде бізге қолдау көрсету арқылы дәлелдеді. Біз оны ешқашан ұмытпаймыз, – деді Т.Николич.
***
Сербия Президенті Т.Николичтің Қазақстанға ресми сапары аясында мынадай екіжақты құжаттарға қол қойылды:
– Қазақстан Республикасы Үкіметі мен Сербия Республикасы Үкіметі арасындағы халықаралық автомобиль қатынасы туралы келісім;
– Қазақстан Республикасы Үкіметі мен Сербия Республикасы Үкіметі арасындағы қосарланған салық салуды және табыс пен капиталға қатысты салық төлеуден жалтаруды болдырмау туралы конвенция.