Қазақстан Президенті қазақ-түрік бизнес форумы аяқталғаннан кейін БАҚ өкілдеріне арналған брифинг барысында елдегі су тасқынына байланысты ахуалға тоқталды. Мемлекет басшысы Қазақстанның бес облысына су жайылғанын айтты. – Қардың жылдам еруі, күннің күрт жылынуы осындай жағдайға әкелді. Қазірдің өзінде 15 мың адам көшірілді, материалдық шығын бар. 5500 адам және 1500 техника жұмысқа тартылып, зардап шеккендерге көмек көрсетілуде. Бағымызға орай, адам шығыны жоқ. Төтенше жағдай органдары мен басқа да қызметтердің өкілдері ерлікке барабар жұмыс атқаруда. Олардың бәріне зор ризашылығымды білдіремін. Мен өңірлердің әкімдерімен ұдайы байланысып отырмын. Қарағанды облысына 1 миллиард теңге бөлінді. Ол жақта су қайта бастады. Тасқын су мәселесін шешеміз деп ойлаймын, бұған қажетті ресурстардың бәрі бар, барлық мүмкіндіктер пайдаланылуда. Аса қатты алаңдауға ешқандай негіз жоқ, – деді Нұрсұлтан Назарбаев.