Комиссия отырысын ашқан Г.Әбдіқалықова «Қазақстан жаңа жаһандық нақты ахуалда: өсім, реформалар, даму» атты Жолдауында Мемлекет басшысы жаңа әлеуметтік саясат ұсынғанын айтты. Елбасы атап өткендей, «әлеуметтік саясаттағы мемлекеттің басымдығы бар ісі адами капиталды дамытуға кең ауқымды инвестициялар салу болуға тиіс». Бұл орайда әлемнің үздік университеттерінде жоғары білікті кадрлар даярлау мәселесі маңызды мәселе болып отыр. Мемлекеттік хатшы ұлттық экономиканың жетекші салаларын қарқынды дамыту үшін озық білім мен тәжірибені белсенді түрде трансферттеу үдерісіндегі стипендияның ерекше рөлін атап өтті. Комиссия шешімімен әлемнің жетекші ғылыми және өндірістік орталықтарына магистратурада және докторантурада оқуға, тағылымдамаға жіберілетін 375 үміткерге стипендия тағайындалды. Сондай-ақ Комиссия жұмысы аясында 2016 жылға арналған Басымдығы бар мамандықтар тізбесі бекітілді. Мамандықтардың жаңа тізімі мемлекеттік органдар тапсырыстары бойынша ғана жасақталды және екі есеге дейін қысқартылды. Тізбеде барлығы 161 мамандық ұсынылған, оның 45-і – медициналық, 67-сі – техникалық, 49-ы –гуманитарлық мамандық. Отырысты қорытындылаған Мемлекеттік хатшы жаңа 2016 жылы стипендия белгілеу ісін жетілдірудің жаңа бағыттарын жүзеге асыруға және үміткерлерді іріктеудің сапасын арттыруға қатысты бірқатар тапсырма берді.