Қазақстан Республикасының қаржылық тұрақтылық және қаржы нарығын дамыту жөніндегі бұрын жұмыс істеген Кеңесінің базасында Қазақстан Республикасы Президентінің 2019 жылғы 18 желтоқсандағы №220 Жарлығымен Қазақстан Республикасының қаржылық тұрақтылық жөніндегі Кеңесі (Кеңес) құрылды.
Кеңес Қазақстан Республикасының Президенті жанындағы консультативтік-кеңесші орган болып саналады және Қазақстан Республикасының қаржылық тұрақтылығын қамтамасыз ету жөніндегі мәселелерді ведомствоаралық үйлестіруді жүзеге асырады.
Кеңестің негізгі міндеті – Қазақстан Республикасының қаржылық тұрақтылығын қамтамасыз етуге және жүйелі тәуекелдердің алдын алуға және азайтуға жәрдемдесу. Кеңестің қызметіне макропруденциялық саясат, дағдарысқа қарсы шаралар, төлем қабілеті жоқ банктер мен банк секторын сауықтыру жөніндегі қаржылық іс-шаралар мәселесін алдын ала қарау кіреді. Кеңес қаржылық тұрақтылықты қамтамасыз етуге және жүйелі тәуекелдерді барынша азайтуға қатысты басқа да сұрақтарды қарап, талқылау қорытындылары бойынша ұсыныстар бере алады.
Кеңеске Кеңес төрағасы жетекшілік етеді.
Қазақстан Республикасының қаржылық тұрақтылығы жөніндегі кеңестің
ҚҰРАМЫ
Қазақстан Республикасы Ұлттық Банкінің Төрағасы, төраға;
Қазақстан Республикасы Қаржы нарығын реттеу және дамыту агенттігінің төрағасы;
Қазақстан Республикасының Қаржы министрі;
Қазақстан Республикасының Ұлттық экономика министрі;
Қазақстан Республикасы Президентінің әлеуметтік-экономикалық мәселелерге жетекшілік ететін кеңесшісі;
«Астана» халықаралық қаржы орталығының басқарушысы.
Кеңестің жұмысшы органы – Ұлттық банк болып табылады.
Жалпы алғанда, Кеңестің қызметі мемлекеттік органдардың қаржылық тұрақтылықты дамыту жөніндегі іс-шараларын үйлестіру тиімділігін еселеуге мүмкіндік беріп, қаржы жүйесінің тұрақтылығын арттыруға көмектеседі.